Aik adhuri nazm…..

Ham apni umar k barte hue lamhon ko daikhte hain

aur sochte hain

shabaan-e-hijr k jaise ye “jaangusil lamhe”

jiye to hain hamne

magar kaise….?

chashm-e-hairaan main hazaarha sapne

bune to hain hamne

magar kaise…..?

kitne hi gharonde banaye

taaqch-e-khaab pe rakhe, jaan-ba-lab,

timtimate hue charaghon k neeche

or taud diye……..

andhairon se dosti kar li

aabaad raaste chaud diye …….

qehqahon k mailon se khareedi

lataadaad tanhai …..

apne naqoosh tou bhool gaye

anginat anjaane hayolon se kr li aashnaai…..

kitne hi ashk……….

aankhon se

izn-e-rukhsat mangne jab bhi aaye

kahan di hamne……

haan ik muskarahat

(jo munjamid hi reh gayi

harf-e-dua se aari honton par)

daan ki hamne…..

aaj bhi in barte hue lamhon ko daikhte hain

aur sochte hain

harf-e-umeed to likha hamne,

shikastagi na miti………..

haan umr ko tou barta hamne,

pe zindagi na mili…………………

Fitna Gar

Payam-e-dilnasheen de kar, aseer-e-khaab kar dala

nigah-e-fitna gar teri, qehar kya dhaa gayi ham par

Saraab

Manzil manzil har ik rasta sehra daikha
sahil sahil pyaas ka behta darya daikha
taariki main jugnu ki bai sood riyazat
roshan roshan har chehre par saya daikha

Nazrana

Bech kar nafs khareede jo razaa-e-Rubee

na kare shak,han kahe haq jo k har hukm-e-nabi

waar de jaan,kre daan jo deen par hastee

kon hai tere siwaa shair-e-Khuda, Maula ALi

Zindagi

Main ne zindagi jhaili hai youn

jaise dhoop main jalta kanwal

Aagahi

Ujle, nikhre, hanste chehre

roshan jugnu jaisi aankhain

unki oat main jhaank rahi hoon

jalti rait ko phaank rahi hoon……….