Shaur na itnaa machaao, farwari k barisho
dhun koi meethi sunao, farwari ki barisho
Woh jo de kar pyaas jalta chor ke rukhsat hua
kuch khabar us ki sunao, farwari ki barisho
Haath main aisi lakeerain khench do k rah main
koi tou aaye padhao, farwari ki barisho
Qatra qatra ji main utro tum bhi daikho sath mere
kis qadar gehra hai ghaayo, farwari ki barisho
Toot k barso k ab tou sard ho tapte badan main
Hijr ka jaltaa alaao, farwari ki barsho
Utarti shaam hai jab bhi
to chaaron or jaane kyon
aawazain gungunati hai, aanokhe raag bajte hain
kai yadon k angaare , kabhi jalte hain, bujhte hain
na jaane kitne hi alfaaz…
zehn-o-dil ke safhe par, simat’te hain, bikharte hain
kabhi kuch yaad karne ki, koi uljhan, koi koshish
kabhi sab bhool jaane ki anokhi si koi khawahish
kabhi bin soch ke lamhe, sirak jaate hain haathon se
phir unko thaam laine ki, koi nakaam si kawish
Lahoo ko munjamid karti………..
utarti shaam ki ye chup
parindon ke gharon ko laut jane k kai manzar……
koi rasta dikhaate hai, or umeedain badhate hain
magar un se
magar un se………
ham aankhian phair laite hain…
nahin ham daikhte un ko
‘ke dhundle se yehi raste,ye aadhi aagahi hi tou
aazaab-e-jaan shuru se hain
ham hi kya mubtila-e-gham
sabhi insaan shuru se hain’……..
‘Kinaare par pohanchne ki, riyaazat umar bhar ki hai
kinaare par pohanch kar bhi, safar ne saath kab choda’
or aadhi aagahi ka dukh hamesh hamsafar mera……..
Kabhi ae kaash kuch bole…
ye chup chup si utarti shaam
kabhi ae kaash kuch panchchi
gharon ko laut na jain
hamaare paas reh jain
koi naghma suna jain
kuch aisa raaz keh jain
‘jo todhe is ghani chup ko
mukammil jo hamain kar de’………
Ham apni umar k barte hue lamhon ko daikhte hain
aur sochte hain
shabaan-e-hijr k jaise ye “jaangusil lamhe”
jiye to hain hamne
magar kaise….?
chashm-e-hairaan main hazaarha sapne
bune to hain hamne
magar kaise…..?
kitne hi gharonde banaye
taaqch-e-khaab pe rakhe, jaan-ba-lab,
timtimate hue charaghon k neeche
or taud diye……..
andhairon se dosti kar li
aabaad raaste chaud diye …….
qehqahon k mailon se khareedi
lataadaad tanhai …..
apne naqoosh tou bhool gaye
anginat anjaane hayolon se kr li aashnaai…..
kitne hi ashk……….
aankhon se
izn-e-rukhsat mangne jab bhi aaye
kahan di hamne……
haan ik muskarahat
(jo munjamid hi reh gayi
harf-e-dua se aari honton par)
daan ki hamne…..
aaj bhi in barte hue lamhon ko daikhte hain
aur sochte hain
harf-e-umeed to likha hamne,
shikastagi na miti………..
haan umr ko tou barta hamne,
pe zindagi na mili…………………
Payam-e-dilnasheen de kar, aseer-e-khaab kar dala
nigah-e-fitna gar teri, qehar kya dhaa gayi ham par
Manzil manzil har ik rasta sehra daikha
sahil sahil pyaas ka behta darya daikha
taariki main jugnu ki bai sood riyazat
roshan roshan har chehre par saya daikha
Bech kar nafs khareede jo razaa-e-Rubee
na kare shak,han kahe haq jo k har hukm-e-nabi
waar de jaan,kre daan jo deen par hastee
kon hai tere siwaa shair-e-Khuda, Maula ALi
